ég heiti Guðrún Ragna Sigurjónsdóttir. Leiðin mín inn í prjónið var ekki alveg bein vegna þess að ég er örvhent og mamma kunni bara að kenna mér rétthent. það tók langan tíma fyrir mig að læra að elska prjónið en Í dag prjóna ég rétthent en fitja upp örvhent og það virkar vel fyrir mig. Kannski táknrænt fyrir það hvernig ég nálgast prjónið almennt, ég vil skilja hefðirnar en líka finna leiðina sem hentar mér.

Ég er útskrifaður fatahönnuður frá Listaháskóla Íslands og hef unnið við fata- og prjónahönnun í mörg ár. 

Fyrsta uppskriftin mín kom út 2004 fyrir Ístex og síðan hef ég hannað fjölda uppskrifta fyrir þau.

Ég var einn af stofnendum og aðalhönnuður As We Grow í tíu ár og kynntist þá náið hvernig verksmiðjuframleiðsla á prjónafatnaði fer fram.

Í dag nýti ég þekkingu mína úr fataframleiðslu til þess að búa til flíkur án síðasta söludags. 

Í mínum huga er prjón mótvægi við neyslusamfélagið og fjöldaframleiðslu. Þar eru ræturnar. Mín eigin handgerðu föt í fataskápnum eru toppurinn. Hið eina sanna „slow fashion” . Ég kann að meta gæði.

Áherlslan hjá EKTA er á klassískar, tímalausar flíkur. Fagurfræðin, gæðin og smáatriðin eru höfð í hávegum. Hvernig hefðir í íslensku prjóni hafa þróast. Ég laðast mikið að árunum milli 1950-70 en finn alltaf leið til að láta hlutina passa inn í nútímann.

Þegar hugur og hönd vinna saman gerast töfrar sem erfitt er að útskýra. Áhugi minn liggur í að skapa og þróa í handverkinu sjálfu. Úthugsa smáatriðin og passa að flíkin sitji rétt.

Þetta er ferli með tilgang. Ég nýt alls ferilsins, líka þegar ég þarf að rekja upp. Ég set hjarta og sál í að skrifa leiðbeiningar sem eru nákvæmar og blátt áfram svo allir geti skilið þær og treyst uppskriftinni.